បាត់ដំបង៖ អាជ្ញាធរខេត្តបាត់ដំបងនៅព្រឹកថ្ងៃទី៣០ ខែធ្នូ ឆ្នាំ២០២១នេះ បានចុះរៀបចំសណ្តាប់ធ្នាប់ របៀបរៀបរយនៅផ្សារបឹងឈូក និងតំបន់ផ្សារបឹងឈូក ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។ ការចុះរៀបចំនេះធ្វើឡើងបន្ទាប់ពីរដ្ឋបាលក្រុងចេញសេចក្តីជូនដំណឹងឱ្យម្ចាស់ផ្សារ និងក្រុមអាជីវករឈប់លក់ដូរឬអាស្រ័យផលនៅលើផ្លូវជុំវិញផ្សារ។
យោងតាមសេចក្ដីជូនដំណឹងរបស់រដ្ឋបាលក្រុង បានបញ្ជាឱ្យរុះរើចេញវិញសំណង់ថ្មីៗទើបសាងសង់រួចរួមមាន សំយាបផ្សារនៅផ្នែកខាងមុខផ្សារ និងរោងចំណតសង់នៅលើទ្រូងផ្លូវត្រង់ចំណុចចេញចូលផ្សារឆៀងខាងត្បូងខាងកើត(ក្បែរអតីតសាលាពេទ្យ) ហាមសាងសង់សំណង់ការបិទបាំង និងការហ៊ុព័ទ្ធគ្រប់ប្រភេទនៅលើចិញ្ចើមផ្លូវ(ខឿនមុខផ្ទះ)ជុំវិញផ្សារនិងក្នុងតំបន់ផ្សារបឹងឈូកទាំងអស់ ដែលមិនស្ថិតនៅក្នុងដីកម្មសិទ្ធិឯកជនរបស់ខ្លួន ដូចជារោងដែក ឃ្លុបដែក ហាងកាហ្វេ។ល។
អាជ្ញាធរបញ្ជាក់ថា គោលបំណងនៃការរៀបចំនេះគឺដើម្បីរក្សាសោភ័ណភាព អនាម័យ បរិស្ថាន សណ្តាប់ធ្នាប់របៀបរៀបរយ និងសុវត្ថិភាពសាធារណៈដែលរថយន្តពន្លត់អគ្គីភ័យអាចចេញចូលបាន ព្រមទាំងដើម្បីចូលរួមចំណែកទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត។
គួររំលឹកផងដែរថា អស់រយៈពេលជាច្រើនខែមកហើយដែលមានការតវ៉ាពីសំណាក់អាជីវករលក់ដូរនៅជុំវិញផ្សារបឹងឈូកនេះដើម្បីស្នើសុំបានលក់នៅកន្លែងដដែល ខណៈអាជ្ញាធរខេត្តថាមិនអាចអនុញ្ញាតឱ្យបន្តលក់នោះទេដោយសារប៉ះពាល់ដល់សណ្ឋាប់ធ្នាប់សាធារណៈជាពិសេសគឺការប្រើប្រាស់ផ្លូវជុំវិញផ្សារ។
អាជ្ញាធរក៏បានរៀបចំទីតាំងថ្មីដល់អាជីវករឱ្យទៅលក់ផងដែរ តែក្រុមអាជីវករទាំងនោះបដិសេធមិនព្រមទៅដោយថាការឱ្យទៅលក់ដូរកន្លែងផ្សេងនឹងធ្វើឱ្យពួកគាត់ខាតបង់នូវចំណូលដែលធ្លាប់លក់បាន៕